Laxavon á silungasvæði Breiðdalsár

Á Veiðivísi hefur töluvert verið fjallað um ódýr laxveiðileyfi undanfarnar vikur. Á silungasvæðinu í Breiðdalsá er ágætis laxavon. Síðasta sumar komu 60 laxar á land á þessu svæði en auk þess veiddust ríflega 300 silungar - urriðar, sjóbirtingar og sjóbleikjur.

Á svæðinu eru fjórar stangir. Í júlí og til loka september kostar stöngin á þessu svæði tæplega 25 þúsund krónur og fylgir gott veiðihús með uppábúnum rúmum, þar sem 6 til 8 manns geta gist.

Veiðisvæðið sem um ræðir er víðfemt og síbreytilegt. Frá 1. júlí og út veiðitímann færist veiðin ofar en í vorveiðinni og efra svæðið í Norðurdal kemur en auk þess að veiða í Breiðdalsá er leyfilegt að veiða í Norðurdalsá. Þá eykst laxavonin að sjálfsögðu eftir því sem líður á sumarið. Leyfilegt er að veiða á flugu og spún. Hirða má tvo laxa á stöng á dag en sleppa verður öllum laxi sem er 70 sentímetrar eða stærri.

Hægt er að nálgast frekar upplýsingar á vefsíðu Veiðiþjónustunnar Strengja.

Fyrir skömmu fjallaði Veiðivísir um ódýr laxveiðileyfi og var þar bent á 18 ódýrar laxveiðiár. Greinina má lesa hér.

trausti@frettabladid.is