Laxá í Kjós: Ellefu fallegir eins árs fiskar

Ellefu laxar komu land í Laxá í Kjós í gær. Þetta voru allt fallegir eins árs fiskar samkvæmt því sem segir á heimasíðu Veiðifélagsins Hreggnasa. Laxinn hefur greinilega dreift sér vel um ána enda veiddust fiskar á öllum svæðum hennar.

"Mjög fallegt vatn er í ánni, og mjög mikið af fiski var í ósnum þannig að gaman verður að fylgjast með gangi mála næstu daga," segir á vef Hreggnasa.

Undanfarin ár hafa verið mjög góð í Kjósinni. Í fyrra veiddust þar 1.112 laxar, árið 2010 voru þeir 1.170, árið 2009 veiddust 1.404 laxar og árið 2008 komu 1.530 laxar á land.

trausti@frettabladid.is