Aldrei verið jafnfljótir að sjá hlaupið

„Menn sáu ummerkin á mælum, skynjurum og gruggi í vatni. Þá flugu þeir yfir katlana og sáu að sá vestari ketillinn er að síga," segir Snorri en útaf öllum þessum mælum varð óvenju snemma vart við hlaupið.

Hlaupið verður fremur lítið og mun ekki hafa í för með sér neina hættu að öðru leyti en því að brennisteinsgas getur verið við útfall hlaupsins og fólki er ráðið frá því að ferðast þangað.

Skaftárhlaup verða þegar katlar undir jöklinum tæma sig, en vatn safnast þar fyrir vegna jarðhitastöðva á svæðinu. Hlaupin eru allt að því árviss viðburður að sögn Snorra, enda þurfa katlarnir að tæmast reglulega. Hlaup úr vestari katlinum eru minni en úr þeim eystri.

„Þetta getur þó orðið til þess að eystri ketillinn tæmi sig líka," segir Snorri. Hann getur ekkert sagt til um hve lengi hlaupið mun standa en það gæti verið fáeina daga.