Leiknismenn jöfnuðu í lokin og Víkingar komust ekki á toppinn

Víkingar úr Ólafsvík voru aðeins þremur mínútum frá því að komast í toppsæti 1. deildar karla í kvöld þegar þeir heimsóttu Leiknismenn í Efra-Breiðholtið. Leiknismenn jöfnuðu í lokin og tryggðu sér 1-1 jafntefli og mikilvægt stig í fallbaráttunni. Þróttarar eru enn með í baráttunni um sæti í Pepsi-deild karla næsta sumar eftir 1-0 sigur á botnliði ÍR.

Arnar Sveinn Geirsson kom Víkingum yfir strax á 11. mínútu með sínu fyrsta marki síðan í júní og þannig var staðan þar til að Kristján Páll Jónsson jafnaði metin fyrir Leikni á 87. mínútu. Víkingur er í 2. sæti með jafnmörg stig og topplið Þórs en með lakari markatölu auk þess að Þórsarar hafa leikið tveimur leikjum færra.

Arnþór Ari Atlason tryggði Þrótturum 1-0 sigur á ÍR en þetta var fimmti sigur liðsins í síðustu sex deildarleikjum. Þróttur er í 4. sætinu fimm stigum á eftir efstu tveimur liðunum.



Úrslit og markaskorarar í 1. deild karla í kvöld:

Leiknir R. - Víkingur Ó. 1-1

0-1 Arnar Sveinn Geirsson (11.), 1-1 Kristján Páll Jónsson (87.)

Þróttur R. - ÍR 1-0

1-0 Arnþór Ari Atlason (11.)

Upplýsingar um markaskorara fengnar af netsíðunni úrslit.net.