Íslensku stelpurnar mæta Úkraínu í umspilinu

Það er búið að draga fyrir umspilið um sæti í úrslitakeppni Evrópumóts kvenna í fótbolta sem fram fer í Svíþjóð næsta sumar. Íslensku stelpurnar voru í pottinum þegar dregið var í í höfuðstöðvum UEFA í dag og mæta Úkraínu.

Úkraína var í riðli með Finnlandi í undankeppninni og endaði þremur stigum á eftir finnska liðunu eftir að hafa unnið 1-0 sigur í Helsinki í lokaleik riðilsins og 5-0 útisigur á Hvíta-Rússlandi fjórum dögum fyrr.

Íslensku stelpurnar voru í efri styrkleikaflokki í drættinum ásamt Rússlandi og Spáni. Þær áttu því aðeins möguleika á því að lenda á móti Skotlandi, Úkraínu eða Austurríki.

Leikdagarnir eru 20. eða 21. október annars vegar og 24. og 25. október hins vegar og er leikið heima og heiman. Íslenska liðið á seinni leikinn á heimavelli alveg eins og þegar þær slógu út Írland fyrir fjórum árum síðan.

Umspilsleikirnir um sæti á EM 2013:

Skotland - Spánn

Úkraína - Ísland

Austurríki - Rússland

Sú þjóð sem hefur betur í þessum tveimur leikjum tryggir sér sæti á EM 2013.