Ellefu laxar á land

Eins og gefur að skilja er farið að hægja mjög á laxveiðinni í hafbeitaránum á Suðurlandi. Samtals veiddust 11 laxar vikuna 17 til 24. október. Þetta kemur fram á vef Landssambands veiðifélaga - angling.is.

Í Ytri-Rangá veiddust fjórir laxar í síðustu viku og er heildarveiðin nú komin í 4.351 lax. Í fyrra veiddist 4.961 lax í Ytri-Rangá. Í Eystri-Rangá veiddust einni fjórir laxar í síðustu viku og hafa því í heildina veiðst 2.954 laxar í ánni. Í fyrra veiddust 4.387 laxar í Eystri-Rangá.

Enn er veitt í Affallinu í Landeyjum en vikuna 17. til 24. þessa mánaðar veiddust tveir laxar í ánni. Alls hafa veiðst 480 laxar sem er aðeins betra en í fyrra þegar 476 laxar veiddust í ánni. Einn lax veiddist í Þverá í Fljótshlíð í síðustu viku. Heildarveiðin er þar með komin í 476 laxa en í fyrra veiddust í heildina 119 laxar í Þverá.

Þess ber að geta að veiðin í þessum ám er ekki sérlega mikið stunduð á þessum árstíma en þó eru alltaf einhverjir veiðimenn sem láta sig hafa það. Á morgun er fyrsti vetrardagur og hafi menn sérstakan metnað til þess að veiða lax að vetri til hafa þeir tækifæri til þessu næstu fimm daga.

trausti@frettabladid.is