Mest lesið á Lífinu 2012

Jón Jónsson, Manúel Ósk Harðardóttir, Ásdís Rán og Kristrún Ösp tróna á toppnum yfir mest lesnu fréttir Lífsins á árinu sem er að líða undir lok. Þá var Angelina Jolie ómótstæðileg, Madonna unglegri, Gordon Ramsey skemmti sér í Reykjavík og Arnar Gunnlaugs kolféll fyrir bandarískri Hollywoodstjörnu.

1. Hvaða yngingarmeðal tekur þú inn?

Mest lesna fréttin á Lífinu árið 2012 var myndafrétt þar sem við spurðum einfaldlega hvað Madonna, þá 52 ára, gerir til að viðhalda unglegu útliti. Spurning hvort ungi kærastinn hennar hafi áhrif á útlitið eða meinhollt mataræðið?

2. Fjölmenni á árshátíð 365

Önnur vinsælasta fréttin var myndasyrpa frá árshátíð 365 miðla sem fram fór á Hilton Reykjavík Nordica Hótel í mars. Það var Björn Bragi Arnarson fjölmiðlamaður sem stýrði gleðinni þar sem hátt í 400 spariklæddir gestir fögnuðu.

3. Glamúrinn við útlandið var fljótur að fölna

"Glamúrinn við útlandið var fljótur að fölna og heimþráin magnaðist upp með hverju árinu," sagði Manúela Ósk Harðardóttir í janúarlok sem þá prýddi fyrstu forsíðu Lífsins, þá nýtt vikublað sem fylgir Fréttablaðinu á föstudögum.

4. Ásdís Rán og Garðar skilin

Fyrirsætan Ásdís Rán Gunnarsdóttir og Garðar Gunnlaugsson skildu eftir níu ára samband og sex ára hjónaband í febrúar. Þetta staðfesti Ásdís við Lífið en þegar hún var stödd í Búlgaríu og Garðar á Íslandi.

5. Kristrúnu Ösp fannst fúlt að gert var grín að sér í Áramótaskaupinu

Kristrúnu Ösp Barkardóttur, fyrirsætu, fannst áramótaskaupið skemmtilegt en fannst frekar fúlt þegar gert var grín að sér. Þetta var á meðal þess sem kom fram í Hitaklefanum í útvarpsþættinum FM95BLÖ á FM957. Þar sagði Kristrún aðspurð að Sveinn Andri Sveinsson, lögmaður, hafi ekki sent sér jólakort en hún hafi heyrt í honum yfir hátíðarnar.

6. Uppgötvaður af L.A. Reid og kominn á samning hjá Sony

Tónlistarmaðurinn, ritstjórinn og knattspyrnukappinn Jón Ragnar Jónsson landaði plötusamningi við Sony eftir að hann heillaði útgáfustjórann og X Factor-dómarann L.A. Reid. "Það hlaut að vera að það kæmi að því að þið þefuðuð þetta uppi," sagði Jón.

7. Myndir frá minningarathöfn Whitney Houston

Myndasyrpa frá minningarathöfn Whitney Houston, sem lést á árinu, var sjöunda mest lesna fréttin á Lífinu. Maðurinn sem hún var gift í 15 ár, Bobby Brown, strunsaði út úr kirkjunni stuttu eftir að athöfnin, sem var falleg og tilfinningaþrungin, hófst því fylgdarliði hans bauðst ekki að sitja á fremsta bekk í kirkjunni.

8. Skemmtu sér á hótelinu nokkrum klukkustundum eftir andlát Houston

Fjöldi stjarna mættu til þess að skemmta sér á sama hótelið og Whitney Houston fannst látin á, aðeins nokkrum klukkustundum eftir andlát hennar. Um var að ræða fyrirpartý vegna Grammy verðlaunanna sem fram fór umrætt kvöld.

9. Bieber í kuldanum eftir rifrildi

Það gekk á ýmsu hjá Justin Bieber. Poppstjarnan og núverandi, fyrrverandi eða þáverandi kærastan hans, Selena Gomes, reyndu að settla málin á veitingahúsinu Yamato í Kaliforníu eftir að upp úr sauð þegar drengurinn fór hamförum baksviðs á Victoria´s Secret undirfatasýningunni þar sem hann reyndi við flest allar fyrirsæturnar.

10. Ólétt Angelina Jolie í ómótstæðilegum kjól

Í byrjun árs héldu slúðurmiðlar vestan hafs því fram að stórstjarnan gengi með barn undir belti sem reyndist ekki vera rétt. Í myndafréttinni var Angelina hinsvegar ómótstæðileg eins og ávallt klædd í svartan Michael Kors kjól.

11. Arnar Gunnlaugs kolféll fyrir bandarískri leikkonu

Leikkonan Michaela Conlin eyddi áramótunum á Íslandi í fyrra. Þetta var ekki í fyrsta sinn sem Conlin sótti landið heim en leikkonan og fyrrum knattspyrnuhetjan Arnar Gunnlaugsson felldu hugi saman. Það var engin önnur er mágkona Arnars, Ásdís Rán Gunnarsdóttir, sem átti heiðurinn að sambandinu.

12. Gordon Ramsey skemmtir sér í Reykjavík

Stjörnukokkurinn og ólátabelgurinn Gordon Ramsay skemmti sér í miðbæ Reykjavíkur í byrjun maí. Kokkurinn sást meðal annars á skemmtistaðnum B5 þar sem hann skemmti sér ásamt félögum sínum í svokölluðu VIP - herbergi staðarins.