Lína innblásin af spíritisma

Sævar Markús Óskarsson frumsýndi fyrir stuttu brot úr fyrstu fatalínu sinni. Línan er bæði ætluð konum og körlum og inniheldur kjóla, jakka og buxur svo fátt eitt sé nefnt og er meðal annars innblásin af spíritisma og tékkneskum kvikmyndum frá sjöunda áratugnum.

Sævar sendir fatalínuna frá sér í haust. Hann stundaði nám í myndlist og listasögu áður en hann snéri sér óvænt að fatahönnun.

„Mig langaði að sérhæfa mig í fræðigreinum sem tengjast sögu og fornmunum en flutti til Parísar og fékk verkefni við búningagerð fyrir sýningu í gallerýi í eigu hönnuðarins Agnès B. Það gekk mjög vel og í kjölfarið kviknaði áhugi minn á fatahönnun," útskýrir hann.

Sævar Markús hefur varið miklum tíma í hönnun fatalínunnar og segist hafa sótt innblástur til margra ólíkra þátta.

„Innblásturinn kemur víða en helst frá málverkum frá lok 19. aldar sem eru kennd við Art Brut hreyfinguna. Verkin eru unnin út frá spíritisma og þaðan koma til dæmis munstrin sem ég nota í kjólana. Sniðin eru svo mikið til unnin út frá tísku sjöunda áratugarins, sem ég hef mikið dálæti á, og tékkneskum kvikmyndum."

Kvenlínan inniheldur meðal annars kjóla og skyrtur og herralínan, sem enn er í framleiðslu, mun innihalda jakka, buxur og skyrtur.

Sævar Markús kveðst spenntur fyrir því að fá báðar línurnar fullkláraðar til sölu í versluninni Kiosk en situr þó ekki auðum höndum þangað til.

„Ég er líka að vinna verkefni í samstarfi við útlenda vini mína og farinn að leggja drög að næstu línu." -sm