Þeytir skífum af ástríðu fyrir dansóðan landann

Francesca Lombardo er plötusnúður á uppleið og þeytir skífum á Faktorý annað kvöld fyrir íslenska dansunnendur.

„Ég held að það verði frábær upplifun að kynnast landinu og tónlistarunnendum þess," segir hin ítalska Francesca Lombardo sem þeytir skífum annað kvöld á Faktorý.

Kanilhópurinn skipuleggur komu hennar til landsins en hann hefur staðið fyrir danskvöldum með hústónlist undanfarið rúmt ár á Faktorý og flutt inn fjölda erlendra plötusnúða.

Francesca sló nýverið í gegn eftir að hafa skrifað undir samning hjá plötufyrirtækinu Crosstown Rebels, sem er eitt það umfangsmesta í danstónlist. Með samningnum er hún komin með sömu umboðsskrifstofu og nöfn á borð við Art Department, Jamie Jones og Maceo Plex.

Fyrsta plata hennar á vegum fyrirtækisins kom út fyrir viku og nefnist Changes. Hún hefur fengið afar góð viðbrögð og situr í fjórða sæti á lista Beatport yfir hústónlist, en síðan er stór í sölu danstónlistar á Netinu. Breiðskífa með lagasmíðum hennar er væntanleg á næsta ári.

„Ég er með mjög litríkan stíl," segir hún og nefnir að hún semji tónlist eftir líðan sinni og sæki innblástur til Depeche Mode, Aphex Twin og Plastikman meðal annarra.

Francesca á að baki fjölbreytta reynslu í tónlist en hún hóf klassískt píanónám og óperusöng ung að árum. „Þrátt fyrir þetta hef ég alltaf heillast af raftónlist og tækjum," segir hún og rifjar upp: „Ég fann mig í rauninni aldrei í klassískri tónlist."

Hún mun spila tónsmíðar sínar í bland við aðra tóna hústónlistar annað kvöld og sjá Jón Eðvald, Steindór Jónsson, Kanilsnældur og Atli Kanill um upphitun. Aðgangur er ókeypis á kvöldið sem mun án efa enda í ógleymanlegum dansi.

„Ég hef verið plötusnúður í tíu ár og byrjaði á því mér til skemmtunar en nú hefur það orðið að aðalástríðu minni," segir Francesca.

hallfridur@frettabladid.is