Arnór: Þetta var alls ekki skemmtileg lífsreynsla

Landsliðsmaðurinn Arnór Atlason samdi um helgina til eins árs við hið sterka þýska félag, Flensburg. Liðið varð í öðru sæti í þýsku úrvalsdeildinni á síðustu leiktíð og leikur því í Meistaradeildinni í ár.

Arnór var tilneyddur að finna sér nýtt lið í kjölfar þess að félag hans, AG frá Kaupmannahöfn, fór á hausinn er Ólympíuleikarnir stóðu yfir.

"Þetta leggst mjög vel í mig enda frábært félag sem ég er að fara í. Það er því gott að hafa náð samningi við þetta félag," sagði Arnór en það var væntanlega engin óskastaða að semja aðeins til eins árs?

"Nei, en ég er samt ánægður með þetta tækifæri. Ég gat ekki verið að setja það fyrir mig og ég reyni að hugsa sem minnst um það. Ég ætla bara að nýta tækifærið sem ég fæ."

Skytta Flensburg, Petar Djordjic, sleit krossbönd síðastliðin þriðjudag og spilar því ekkert í vetur. Strax daginn eftir hafði Flensburg samband við Arnór og hann á að leysa Djordjic af hólmi í vetur. "Það tók stuttan tíma að klára þetta enda báðir aðilar spenntir fyrir samstarfi."

Arnór mun flytja alla fjölskylduna til Þýskalands en sonur hans var byrjaður í dönskum skóla og svo á konan hans von á sér á hverri stundu.

"Það er búið að heita því að það verði hugsað mjög vel um okkur. Konan mín hafði heyrt í íslensku stelpunum sem hafa verið hérna áður og okkur líst vel á þetta. Það verður mjög gaman og spennandi að fara þarna," sagði Arnór.

Arnór fékk aðstoð til þess að pakka um helgina svo fjölskyldan gæti drifið sig til Þýskalands enda er næsti leikur hjá Flensburg á miðvikudaginn.

"Ég er búinn að ræða mikið við Vranjes þjálfara og hann virkar vel á mig. Hann hefur náð frábærum árangri með þetta lið. Liðið ætlar að reyna að gera jafnvel núna og svo er plús að liðið er í Meistaradeildinni. Þetta ætti því að geta orðið skemmtilegur vetur," sagði Arnór en hann neitar því ekki að það sé léttir að vera búinn að ganga frá sínum málum.

"Það er gott að þetta endaði vel en þetta var alls ekki skemmtileg lífsreynsla. Hún styrkir mann samt vonandi."