Sex leiðir til að tryggja betri sölu

Reynslan sýnir að auðveldara er að selja sumar vörur en aðrar á netinu," segir Jón Trausti Snorrason, eigandi vefsíðufyrirtækisins Allra átta.

Hann vekur athygli á að val á samstarfsaðila skipti sköpum þegar stunda á verslun og viðskipti á netinu og mælir með að áhugasamir hringi jafnvel í viðskiptavini hugbúnaðarfyrirtækja til að fá um meðmæli.

„Val á netverslunarkerfum skiptir líka miklu máli; hvort það er leitarvélavænt, með tengingu við Póstinn, öruggar síður og greiðslugáttir og tungumálastuðning ef selja á vörunar erlendis," tekur Jón Trausti sem dæmi.

Hann segir rekstur netverslunar svipaða því og að reka litla búð við Laugaveg.

„Það kostar svipað og er álíka tímafrekt. Því er alltaf æskilegt að verslunarstjóri sé ábyrgur fyrir vörum sem fara í netverslunina, söluferlinu og afhendingu."

Að sögn Jóns Trausta eykst netverslun jafnt og þétt í heiminum og verður æ fjölbreyttari. „Það er ekki nóg að koma vefverslun í loftið og halda síðan að viðskiptavinir komi af sjálfu sér til að versla. Vefsíðan þarf að finnast á leitarvélum eins og Google og jafnvel vera kynnt eftir hefðbundnum leiðum, með auglýsingu á prenti eða skjámiðlum. Eigi síðan að finnast í leitarniðurstöðum þarf líka að huga að leitarvélabestun," útskýrir Jón Trausti þegar kemur að markaðssetningu.

Samkvæmt upplýsingum frá Hagstofu Íslands verslaði um helmingur netnotenda vörur eða þjónustu í gegnum vefsíður á árinu 2011. „Þar keyptu heimilisfeður bækur, unga fólkið tónlist og inneign á síma og konurnar föt, skó og fylgihluti. Þótt meirihluti verslunar fari enn fram í hefðbundnum búðum hafa bæði neytendur og kaupmenn uppgötvað augljósa kosti netverslunar," upplýsir Jón Trausti.

Samkvæmt Hagstofunni voru algengustu kaupin á netinu 2011 tengd ferðaþjónustu.

„Þar á meðal voru farmiðar, gisting og bílaleigubílar en fast á eftir kom fjarskiptaþjónusta, bækur og hugbúnaður, síðan föt og handverk og hefur sú vara tekið augljósan kipp sem söluvarningur á netinu," segir Jón Trausti.

Á heimsvísu er áætlað að netverslun muni meira en tvöfaldast milli áranna 2012 og 2013 og að sala á netinu fari yfir 1,25 billjónir Bandaríkjadala í lok árs 2013.

Allra átta er í Bolholti 4. Sími 588 8885. Veffang: www.8.is.

Nánari upplýsingar má finna hér.

Leiðirnar sex

1.Vinsælustu vörurnar á forsíðu (út frá mælingum).

2.Einfalt kaupferli (hraðkaup án innskráningar).

3.Frí heimsending (um allt land).

4.Skilatrygging (auðvelt að fá að skipta eða skila vöru).

5.Betra verð á netinu (það á að vera hagkvæmara að versla á netinu).

6.Vörur í boði sem fást aðeins á netinu (einstakar og í takmörkuðu magni).