Réð til sín breskan hljóðversgítarleikara

Tónlistarmaðurinn Hjörtur Geirsson réð breska hljóðversgítarleikarann Nigel Cuff til að spila inn á nýjustu plötuna sína, Watch the Bird Fly (The Raven).

Upptökur fóru fram í hljóðveri Hjartar í Reykjavík og hjá Cuff í Englandi. Sá breski annaðist einnig hljóðblöndun og lokafrágang. Aðspurður segist Hjörtur hafa borgað Cuff góðan pening fyrir aðstoðina. „Ég man ekki hvað ég borgaði honum í heildina. Það voru hundruð þúsunda sem fóru í þetta."

Samstarf þeirra fór fram í gegnum tölvu en Cuff er með hljóðver í borginni Bournemouth. „Hann er sérhæfður popp-rokk gítarleikari sem hentaði mér mjög vel. Ég get sjálfur séð um bassaleik og rytmagítar. Svo syng ég líka og er með bakraddir í nokkrum lögum," segir Hjörtur, sem segist vel geta hugsað sér að ráða hljóðversspilara í næstu verkefni sín.

Hann gefur plötuna út sjálfur og hafa bæði Cdbaby og Amadeamusic séð um dreifinguna. Einnig er hægt að finna lög af henni á síðunum Soundcloud, Myspace og Youtube.- fb