Silungsparadís í Svarfaðardal

Nú styttist í að Stangaveiðifélag Akureyrar hefji veiðileyfasölu fyrir næsta sumar. Félagið hefur meðal annars hina rómuðu Svarfaðardalsá í umboðsölu.

Sjóbleikjan er uppistaðan í veiðinni í Svarfaðardalsá. Sumarið 2012 veiddust þar 647 sjóbleikjur á svæðunum fimm sem ánni er skipt í. Að auki var landað 201 sjóbirtingi og 83 staðbundnum urriðum. Samtals var veiðin í fyrrasumar því 931 silungur í Svarfaðardalsá.

Veitt er frá 1. júní til 10. september í Svarfaðardalsá sem er þó dæmigerð síðsumarsá og fer fyrst almennilega í gang í sjóbleikjunni eftir miðjan júlí. Á svak.is má skoða skiptingu veiðinnar eftir tegundum, dögum og svæðum.

Fram kom í viðtali við Guðrúnu Unu Jónsdóttur, formann SVAK, hér á Veiðivísi um miðjan desember að bjartsýni sé hjá félaginu um góða sölu veiðileyfa fyrir næsta sumar. Benti Guðrún á að félagið einskorði sig við sölu í silung sem sé síður viðkvæmur gagnvart sölusveiflum en hin síhækkandi laxveiðileyfi.