Tiger og Rory báðir úr leik

Nike-kylfingarnir Tiger Woods og Rory McIlroy áttu að eiga sviðið á Abu Dhabi-meistaramótinu í kjölfar þess að Rory skrifaði undir samning við Nike og fyrirtækið setti svo í loftið rándýra auglýsingu með þessum þekktustu kylfingum heims.

Þeir stóðust ekki pressuna sem fylgdi þessum fjölmiðlasirkus og hvorugur komst í gegnum niðurskurðinn á mótinu. Þeir eru úr leik.

McIlroy fór báða hringina á 75 höggum. Tiger fór fyrri hringinn á 72 höggum og hélt að hann hefði farið seinni á 73 sem hefði dugað til að fara áfram. Þá tjáðu dómarar honum að hann hefði fengið tveggja högga víti á 5. holu sem varð þess valdandi að hann féll úr leik.

Englendingurinn Justin Rose leiðir mótið á 8 höggum undir pari.