Ólafur keppir á móti í Flórída | Fékk örn

Ólafur Björn Loftsson, kylfingur úr Nesklúbbnum, er í ellefta sæti á móti sem fer fram í Orlando í Flórída.

Ólafur Björn hefur spilað tvo hringi á samtals 140 höggum og er í 11.-16. sæti fyrir lokahringinn. Hann er fimm höggum frá efsta manni.

Mótið er hluti af mótaröð sem nefnist For the Players og er haldið fyrir kylfinga í Orlando og næsta nágrenni.

Ólafur sagði frá gærdeginum á Facebook-síðu sinni, þar sem hann setti til að mynda niður 97 m högg fyrir erni:

„Lék undir pari í dag án þess að fá fugl! Mjög krefjandi aðstæður á hringnum, sterkir sviptivindar og erfitt að stjórna boltanum. Fékk 16 pör, einn örn og einn skolla. Sló frábært högg beint ofan í holu af 97 metra færi á 11. holu. Gerði fá mistök á hringnum, stutta spilið sterkt en vantaði aðeins að fá nokkur pútt til að detta. Þéttur pakki á toppnum og það getur allt gerst á lokahringnum á morgun!"