48 milljóna rekstrarhagnaður hjá KSÍ á árinu 2012

Knattspyrnusamband Íslands birti í dag inn á heimasíðu sinni ársreikning sambandsins fyrir árið 2012 en rekstrarhagnaður ársins nam tæpum 48 milljónum króna eða fimmtán milljónum minna en áætlanir gerðu ráð fyrir.

Rekstrartekjur KSÍ á árinu 2012 námu 842 milljónum króna samanborið við 777 milljónir króna á árinu 2011. Hækkun rekstrartekna skýrist fyrst og fremst af auknu framlagi frá UEFA.

Rekstrarkostnaður KSÍ var um 795 milljónir króna og var nokkru hærri en áætlun gerði ráð fyrir. Ástæður þess eru fyrst og fremst aukinn kostnaður við landsliðsverkefni sem voru fleiri á árinu en gert var ráð fyrir.

Rekstrarhagnaður ársins nam tæpum 48 milljónum króna, en áætlanir gerðu ráð fyrir rúmlega 63 milljóna króna hagnaði. Að teknu tilliti til fjármagnsliða er hagnaður af starfsemi KSÍ ríflega 72 milljónir króna.

Styrkir og framlög til aðildarfélaga á árinu námu 72 milljónum króna vegna barna- og unglingastarfs, leyfiskerfis og fleira. Samþykkt áætlun gerði ráð fyrir styrkjum og framlögum að fjárhæð 77 milljónum króna. Að teknu tilliti til styrkja og framlaga til aðildarfélaga nam hagnaður ársins því um hálfri milljón króna.

Fjárhags- og eignastaða KSÍ er traust við áramót og lausafjárstaða góð. Handbært fé hækkar á milli ára og var nú í árslok um 473 milljónir króna. Eignir eru metnar á 892 milljónir króna. Eigið fé KSÍ var ríflega 228 milljónir króna í árslok.