Fannst vanta eitthvað fyrir strákana

Sjö stelpur á fjórða ári á viðskiptasviði í Versló gerðu sér lítið fyrir og stofnuðu slaufubúð á Facebook undir nafninu Slaufubarinn. Þar selja þær handgerðar slaufur frá Bandaríkjunum sem eru til bæði for - og sjálfhnýttar. Slaufurnar koma í mörgum útfærslum og henta við hvaða tilefni sem er.

,,Þetta er verkefni í rekstarhagfræðikúrs í skólanum í samstarfi við Unga frumkvöðla þar sem okkur var gert að stofna og reka okkar eigið fyrirtæki. Við vorum allar mjög sammála um að okkur langaði til að gera eitthvað tískutengt fyrir stráka, það er svo lítið framboð af slíku hér heima. Við fórum að grennslast fyrir um hvað það væri sem strákarnir væru að leitast eftir og bróðir einnar okkar kom með slaufuhugmyndina. Hann sagði að þær væru mikið í tísku en að það væri erfitt að finna þær á góðu verði", segir Eydís Ýr Jónsdóttir um hugmyndina að Slaufubarnum.

Hvaðan koma slaufurnar?

,,Við settum okkur í samband við byrgja í Bandaríkjunum sem gerir þessar fallegu handgerðu slaufur. Svo prentuðum við út myndir og gerðum könnun meðal stráka í skólanum um hvaða slaufur væru flottastar og pöntuðum inn þær sem urðu ofan á í kosningunum. Þetta eru yfir tuttugu tegundir".

Hvernig hafa viðbrögðin verið?

,,Ótrúlega góð og jákvæð! Það virðist vera mikil eftirspurn eftir slaufunum og sumir leggja meira að segja inn pantanir fyrir mörgum í einu, en slaufurnar kostar 3.990 kr stykkið. Þetta er æðislegt verkefni og við erum alveg á fullu í þessu núna. Við erum mjög spenntar fyrir þessu öllu saman", segir Eydís að lokum.

Hér er hægt að heimsækja Slaufubarinn á Facebook.