Cavalli fær fullt hús stiga

Haust- og vetrarlína Roberto Cavalli sem sýnd var á tískuvikunni í Mílanó í gær hefur fengið einróma lof í tískuheiminum. Línan er einstaklega falleg og inniheldur einfaldar flíkur í guðdómlega fallegum mynstrum, sem eru að vísu fremur óvanaleg fyrir tískuhúsið. Svarti liturinn var mikið notaður í bakgrunni, en djúpum rauðum, bláum, gráum og gylltum litum var fallega blandað saman við hann. Buxnadragtir og pelsar spiluðu stórt hlutverk sem sannar enn og aftur að þau trend eru komin til að vera.