Bílasala í Evrópu féll um 10,2% í febrúar

Jókst þó í Bretlandi um 7,9%.

Áfram heldur fallið í bílasölu á álfunni og þrátt fyrir að 829.359 bílar hafi selst þá er það ríflega tíund minna en árið á undan, sem ekki var nú gott. Árið í fyrra var versta bílasöluár í Evrópu í 17 ár. Sala Ford féll helmingi meira en meðaltalið, eða um 20,8% og var sala þeirra 53.660 bílar. Næstir á eftir í dræmri sölu voru General Motors með 20,1% minnkun og Fiat með 15,7% minnkun.

Ekki er þetta gott ástand í kjölfar heildartaps bílaframleiðenda í Evrópu í fyrra uppá 875 milljarða króna, en þá féll salan um 8,2% niður í 12,05 milljónir bíla. Búist er við 11,4 milljón bíla sölu í Evrópu í ár. Meira að segja Volkswagen tapaði sölu í febrúar um 10% og Audi um 3,8%.

Honda og Mazda auka sölu - Bretland sker sig úr

Aðeins þrjú bílamerki juku við sig í febrúar í Evrópu, en Honda náði frábærri 27% aukningu, Mazda 13,1% og Hyundai 1,4%. Eitt land sker sig úr, en í Bretlandi var 7,9% aukning í bílasölu í febrúar frá fyrra ári. Fremst í flokki daprar sölu fór Ítalía með 17,4% minnkun, Frakkland með 12,1%, Þýskaland með 10,5% og Spánn með 9,8%