"Þarf ég að muna númer hvað þessi titill er?"

Þorbjörg Ólöf Jónsdóttir, leikmaður nýkrýndra Íslandsmeistara Þróttar frá Neskaupsstað, er búin að týna tölunni hve oft hún hafi unnið titilinn.

„Vá, þarf ég að muna það," sagði Bobba í viðtali við Austurfrétt eftir að Þróttur tryggði sér Íslandsmeistaratitilinn annað árið í röð eftir spennuþrunginn leik gegn HK.

„Á tímabili var það þannig að það kom bikar á eftir barni. Ég á þrjú börn þannig að þetta er að minnsta kosti sá þriðji," segir Bobba en ljóst er að titlarnir eru mun fleiri.

Bobba, sem varð 39 ára í mars, sagði sérstaklega gaman að vinna titilinn á heimavelli. Ekki hefur spillt fyrir að hefna fyrir tapið gegn HK í bikarnum á dögunum en um eina tap Þróttar á tímabilinu var að ræða.

„Við vorum fínar í fyrstu tveimur hrinunum en drullum síðan á okkur í næstu tveimur. Við vissum að við hefðum tvo leiki í viðbót en við vildum klára rimmuna hér heima. Við náðum að rífa okkur upp og klára leikinn," segir Bobba.

Viðtalið við Bobbu í heild sinni má sjá á vef Austurfréttar.