Lexus hyggst framleiða LF-LC

Er 500 hestöfl og mun kosta ríflega 12 milljónir króna.

Lexus ætlar greinilega að styrkja enn ofurbílaímynd sína þrátt fyrir að framleiðslu á Lexus LFA hafi nú verið hætt. Hann er reyndar svo dýr bíll að það er ekki nema á færi ofurríkra að krækja sér í eintak af honum. Nú hefur víst verið tekin ákvörðun um að Lexus LF-LC hugmyndabíllinn sem fyrst sást á bílasýningunni í Detroit í fyrra fari í framleiðslu.

Bílatímaritið Wards Auto hefur þetta eftir yfirmanni markaðsmála hjá Lexus. Hugmyndabíllinn LF-LC er með um 500 hestafla V8 vél og tvinntækni en ekki er víst að það verði lendingin við fjöldaframleiðslu hans. Búist er við því að bíllinn muni kosta ríflega 100.000 dollara, semsagt upphæð norðan megin við 12 milljónir króna. Geta þá aðeins fleiri látið sig dreyma um hann en LFA bílinn. Miðað við huggulegt útlit LF-LC er þá bara að vona að sögusagnir um framleiðslu hans séu réttar.