Fjarðará gaf á fjórða hundrað bleikjur í fyrra

Stangveiðifélag Akureyrar heldur annað kvöld klukkan 20:00 kynningu á Fjarðará í Hvalvatnsfirði fyrir stangveiðimönnum norðan heima. Ætla menn að koma saman í Amaróhúsinu í samstarfi við Veiðivörur.is.

Það er Jóakim K. Júlíusson, lögreglumaður frá Húsavík, sem sér um kynninguna en hann er þaulkunnugur ánni. Samkvæmt veiðibók SVAK veiddust á fjórða hundrað bleikjur í ánni í fyrra sem er mikil aukning frá því árinu áður.

Þeir sem ekki eiga heimangengt, eða treysta sér ekki til að verja mörgum klukkutímum í ferðalög, verða að láta myndband með leiðsögn um Fjarðará í Hvalvatnsfirði duga, en hana er að finna á vef Stangaveiðifélags Akureyrar þar sem veiðileyfi á þetta sjóbleikjusvæði eru seld.

Að því er segir á svak.is heitir svæðið sem um ræðir Fjörður. Það er samheiti yfir dalina sem ganga upp af Þorgeirsfirði og Hvalvatnsfirði sem eru nyrstu firðirnir á skaganum á milli Eyjafjarðar og Skjálfandaflóa. Þar eru tvær bleikjuár, Gilsá sem heitir Fjarðará síðasta spölinn áður en hún fellur í Hvalvatnsfjörð og síðan Hólsá í Þorgeirsfirði.

Í myndbandinu á svak.is er leiðinni að Fjarðará lýst og leiðbeint með veiðistaði þar.

svavar@frettabladid.is