Sprækir urriðar í Elliðaánum

Vorveiðin í Elliðaánum hrökk í gang í gær þegar níu urriðar skiluðu sér á land.

Seinni vaktin í gær náði fimm vænum og fallegum urriðum á stangirnar tvær. Reyndar var það einn og sami veiðimaðurinn, Jón Mýrdal, sem fékk þessa fimm fiska á flugur sínar. Allir komu silungarnir úr Höfuðhyl, efsta veiðistaðnum.

Að því er segir á Facebook síðu Stangaveiðifélags Reykjavíkur fengust fjórir urriðar á morgunvaktinni í gær eftir að tveir fyrstu dagar veiðitímabilsins höfðu verið fisklausir. Skýringin á döpru gengi til að byrja með er sennilegast kuldakastið sem loks lét dálítið undan síga.

Veiðivísi hafa engar fregnir borist af veiði dagsins í dag í Elliðaánum.