Opnunarhollið í Norðurá auglýst til sölu

Stjórn Stangveiðifélags Reykjavíkur mun ekki opna Norðurá í sumar eins og hefð er fyrir heldur selja hana ef viðundandi verð fæst fyrir. "Ef svo fer sem horfir munum við auglýsa eftir tilboðum strax í næstu viku," segir Bjarni Júlíusson, formaður SVFR.

Að minnsta kosti hálfrar aldar hefð er fyrir því að stjórn SVFR opni Norðurá en þar sem hart hefur verið í ári hjá félaginu fór stjórnin þess á leit við aðalfund að fá að bjóða opnunina hæstbjóðanda.

"Þetta eru verðmæti og í ljósi þess að staðan er erfið veltum við því fyrir okkur hvort við ættum að reyna að ná þessum fjármunum. Við ákváðum að stíga skrefið og fengum leyfi aðalfundar til þess," segir Bjarni. "En við seljum þetta ekki nema við fáum viðundandi tilboð því þetta er heilmikils virði."

Opnunarhollið í Norðurá fær tvo og hálfan dag til veiða en Bjarni vill ekki gefa upp hvert viðmiðunarverðið er.

Á aðalfundinum var ákveðið að stjórn SVFR fengi einhverja hóflegri veiði sem er laus í stað opnunarinnar í Norðurá. Spurður hvort ekki sé eftirsjá af þessari gömlu hefð segir Bjarni. "Þegar tímarnir eru erfiðir og það vantar pening er okkur ekkert heilagt nema afkoma Stangveiðifélags Reykjavíkur."