Tiger ætlar ekki að hringja í Garcia

Það andar köldu á milli kylfinganna Tiger Woods og Sergio Garcia þessa dagana. Á það rætur að rekja til atviks á Players-meistaramótinu á dögunum.

Þá reiddist Garcia mjög út í Tiger fyrir að taka upp kylfu áður en hann sló. Fyrir vikið heyrðist í áhorfendum og Garcia vildi meina að köll þeirra hefðu skemmt fyrir sér.

Woods svaraði því til að dómari hefði tjáð honum að Garcia væri þegar búinn að slá og hann mætti því ná sér í kylfu.

Þeir spiluðu saman næsta dag og ræddust ekki við. Það fór ekki fram hjá neinum að lítill vinskapur var á milli þeirra.

Tiger var spurður að því á blaðamannafundi hvort hann hefði íhugað að rífa upp símann, hringja í Garcia og grafa stríðsöxina.

Svarið var einfalt: "Nei," sagði Tiger og glotti við tönn. Blaðamenn fóru þá að skellihlæja.