Bubba Watson: Hægur leikur til vandræða í golfinu

Bubba Watson, fyrrum Mastersmóts-meistari, segir að hægur leikur sé stærsta vandamálið á PGA-mótaröðinni í golfi. Bubba vill berjast fyrir hraðari leik.

„Við höfum miklar áhyggjur af pútterum og golfboltum og slíku en ættum að hafa meiri áhyggjur af hægum leik og hvernig við getum fengið kylfinga til að spila hraðar. Þetta á ekki bara við atvinnukylfinga heldur áhugakylfingana líka," sagði Bubba Watson.

„Það vill enginn spila leik sem tekur fimm og hálfan klukkutíma. Við viljum að allir geti spilað og að allir spili hraðar," sagði Bubba.

Bubba Watson er 34 ára bandaríkjamaður sem vann Mastersmótið árið 2012 en það er eini sigur hans á risamóti. Hann náði bestum árangri á risamótum ársins þegar hann náði 32. sætinu á bæði opna bandaríska og opna breska.