Hljómsveitin Vök með útgáfutónleika í kvöld

Hljómsveitina Vök stofnuðu þau Margrét Rán Magnúsdóttir og Andri Már Enoksson formlega í desember 2012, en þau höfðu áður gert saman tónlist.  Vök tók þátt í Músíktilraunum 2013 þar sem þau sigruðu með miklum glæsibrag.

Á tónleikunum í kvöld skartar hljómsveitin nýjum meðlimi  Ólafi Alexander Ólafsyni  en hann hefur verið að spila með sveitinni undanfarið.  

Ólafur þessi hefur ekki langt að sækja ástríðuna fyrir tónlist enda er hann sonur eins þekktasta útvarpsmanns landsins Ólafs Páls Gunnarssonar á Rás 2.

Tension, sem er sex laga stuttskífa, er nú einnig fáanleg á vínyl. Það er Record Records sem gefur út. Platan kom út á geisladiski í júlí síðastliðnum og hefur fengið lofsamlegar viðtökur. Þá hafa lögin Before og Ég bíð þín notið talsverða vinsælda í útvarpsviðtækjum landsmanna. 

Record Records hefur áður veðjað á hljómsveitir sem hafa unnið Músíktilraunir og má þar nefna hljómsveitirnar Of Monsters and Men, Agent Fresco og Mammút.  Það er því óhætt að segja að þessi árlega keppni sé mikil gróðrarstía fyrir upprennandi hljómsveitir og tónlistarmenn. Record Records bindur miklar vonir við sveitina og hafa nú þegar margir erlendir aðilar sýnt hljómsveitinni áhuga.  

Vök mun fagna útkomu Tension á vínyl með tónleikum á KEX í kvöld næstkomandi.

Miða er hægt að nálgast á miði.is

https://midi.is/tonleikar/1/7896/