Gefur út tvöfalda Airwaves-plötu

For a Minor Reflection gefur í vikunni út tvöfalda plötu sem ber nafnið Live at Iceland Airwaves.

Útgáfan inniheldur hljóð- og myndupptöku af tónleikum sveitarinnar á Iceland Airwaves árið 2012 í Norðurljósum,  Hörpu.

Platan verður fáanleg í plötuverslunum, á iTunes og á heimasíðu hljómsveitarinnar, Foraminorreflection.com.

Kjartan Holm, gítarleikari sveitarinnar, hefur verið á tónleikaferðalagi síðustu misseri með Sigur Rós, og hefur For a Minor Reflection þess vegna haldið sig til hlés á meðan.

Hljómsveitin mun þó stíga á stokk á Iceland Airwaves og frumflytja nýtt efni í bland við eldra. Alls kemur hljómsveitin fram á sex tónleikum í vikunni, þ.e. á aðaltónleikum í Norðurljósum Hörpu á föstudagskvöld, og á fimm öðrum tónleikum utan dagskrár.