Þarf ekki hrotta til að leika hrotta

Leiksýningin Hús Bernhörðu Alba í leikstjórn Kristínar Jóhannesdóttur ætlar að reynast umdeild. Ummæli leikstjórans áður en til frumsýningar kom valda uppnámi innan leikhúsgeirans.

„Það þarf ekki hrotta til að lýsa hrotta á sviði,“ segir María Kristjánsdóttir leikstjóri í samtali við Vísi; um ummæli Kristínar Jóhannesdóttur stöllu sinnar sem féllu í Djöflaeyju Ríkissjónvarpsins í síðustu viku.

Ummælin féllu í viðtali um uppfærslu Kristínar Jóhannesdóttur á leikriti Lorca, Húsi Bernhörðu Alba, eru svohljóðandi: „Ég gerði mér mjög sterka og skýra grein fyrir því í upphafi að þa væri ekki að finna konu í leikarastétt sem væri það mikill hrotti og fauti að hægt væri að gera því trúverðug skil.“

María leikstýrði þessu verki Lorca árið 1989 í Þjóðleikhúsinu og fór þá Kristbjörg Kjeld með titilhlutverkið. Þórunn Sigurðardóttir setti þetta sama verk upp hjá LA og þar lék Sigríður Hagalín heitin titilhlutverkið og hlaut mikið lof fyrir. María segist fullkomlega vanhæf til að tjá sig um uppfærslu vinkonu sinnar Kristínar Jóhannesdóttur. En val Kristínar á Þresti Leó Gunnarssyni í hlutverk Bernörðu Alba hefur vakið umræður víða á netinu. Um leið og menn velta því fyrir sér hvort Þröstur teljist þá nógu mikill fauti til að fara með hlutverkið vekja ummæli Kristínar athygli í ljósi frægrar ræðu sem hún flutti á síðustu Eddu um skarðan hlut kvenna í kvikmyndagerð. „Þetta er mesta rugl sem ég hef á ævinni heyrt,“ segir leikstjórinn Heiðar Sumarliðason á sinni Fb-síðu og Jóhannes Haukur Jóhannesson leikari segir: „Mér finnst þetta fráleit afstaða leikstýrunnar. Fráleit.“

Vísir hefur heimildir fyrir því að víða innan leikhúsgeirans furði menn sig á afstöðu Kristínar og í morgun birti svo Fréttablaðið leikdóm Jóns Viðars Jónssonar þar sem hann gefur sýningunni eina stjörnu. Jón Viðar segir í niðurstöðu:

„Það er afskaplega lítið eftir af meistaraverki Garcia Lorca þegar það kemur út úr pólitískri hakkavél Kristínar Jóhannesdóttur. Sorglegt, er eina orðið sem hægt er að hafa yfir þetta.“