Blóðbað í Brooklyn

Vefsíðan Gawker.com segir frá því að íranskur tónlistarmaður hafi skotið þrjá hljómsveitarfélaga sína og síðan sjálfan sig til bana nú snemma morguns í sameiginlegri íbúð þeirra í Brooklyn, New York.

Samkvæmt fréttinni notaði gerandinn hálf sjálfvirkan riffil í árásinni sem átti sér stað laust eftir miðnætti í gær. Árásarmaðurinn byrjaði á því að særa eina manneskju fyrir utan íbúðina áður en hann gekk inn, skaut tvo til bana á annarri hæð hússins og svo loks þann þriðja,  sem lá sofandi í rúmi sínu, á efstu hæðinni. Tvær manneskjur földu sig inni á baðherbergi íbúðarinnar og sluppu þannig ómeiddar frá voðaverkinu. Að lokum skaut árásarmaðurinn sjálfan sig á þaki byggingarinnar samkvæmt lögreglunni í New York.

New York Times fjölluðu einnig um málið og spjölluðu við nágranna mannana sem sagði að þeir höfðu verið saman í hljómsveitinni Yellow Dogs. Árásarmaðurinn hafði verið rekin úr sveitinni skömmu áður og virðist samkvæmt þessu ekki hafa tekið því vel. Ekkert hefur þó verið gefið upp um eiginlegar ástæður árásarinnar þó þetta virðist vera rökrétt ályktun.

Allir meðlimimr sveitarinnar voru frá Íran og  komu fram í verðlaunaðri heimildarmynd frá árinu 2009 sem fjallaði um neðanjarðar rokktónlistarsenu í Tehran. Eftir að myndin, No One Knows About Persian Cats, kom út árið 2009 flúðu meðlimirnir til bandaríkjanna og óskuðu eftir hæli sem þeir fengu árið 2010, en samkvæmt myndinni er ólöglegt fyrir íranska borgara að spila saman í rokkhljómsveit þar í landi.