Lögreglan neitar að rannsaka kæru Gylfa

Gylfi Ægisson tónlistarmaður kærði Hinsegin daga en fór bónleiður til búðar – lögreglan ætlar ekkert að aðhafast í málinu.

„Ég leyfi mér að kalla þetta barnaníð Barnaverndarnefndar, Aðstoðarsaksóknara og yfirvalda og skal glaður sitja inni fyrir þau orð,“ segir Gylfi meðal annars en hann tilkynnti stuðningsmönnum sínum og velunnurum um hvar málið stendur á stuðningssíðu sinni nú fyrir stundu.

„Eins og þið kannski vitið öll þá kærði ég Hinsegin daga 18 september 2013 til lögreglu og hef fengið svarbréf til baka frá Lögreglunni á höfuðborgarsvæðinu. Er það svohljóðandi:

Lögreglustjóranum á höfuðborgarsvæðinu hefur borist kæra yðar,dags.18 september Sl,, á hendur Hinsegin daga vegna GayPride-göngunnar þann 10. Ágúst 2013. Hér með tilkynnist yður, með vísan til 4. Mgr. 52.gr. laga nr. 88/2008 um meðferð sakamála, að ekki þykja efni til að hefja rannsókn út af kærunni og henni því vísað frá.

Unnt er að bera ákvörðun þessa undir embætti ríkissaksóknara innan mánaðar frá tilkynningu þessari.

Undir skrifar aðstoðarsaksóknarinn Sigurður F Sigurðsson.“

Gylfi segist hafa hringt í eitt lykilvitna sinna í málinu og sá hafi tjáð sér að hann hafi aldrei verið kallaður til yfirheyrslu og málið því ekkert rannsakað. „Þannig að það er eitthvað furðulegt í gangi hjá rannsóknarlögreglunni í þessu máli. Lykilvitnið sá börn með typpasleikjóa á Hinsegin dögum 2013 og margir sendu mér skilaboð um að börn hefðu sést með þá og margir foreldrar sögðust hafa forðað sér úr gleðigöngunni í gegnum árin með börnin sín . Ein 15 ára stúlka skrifaði mér að vinkona hennar hefði gefið sé typpasleykjó á Hinsegin dögum og hann hefði verið góður á bragðið.“

Gylfi er langt í frá ánægður með þessar lyktir mála en ekki liggur fyrir hvort hann vill halda málarekstri sínum til streitu.