Getur Vanilla Ice bjargað Houston Texans?

Það hefur hvorki gengið né rekið hjá NFL-liðinu Houston Texans. Liðið hefur tapað átta leikjum í röð og menn hafa ekki hugmynd um hvað eigi að gera til þess að snúa gengi liðsins við.

Hlaupari liðsins, Ben Tate, segist vera kominn með lausnina. Liðið þurfi að ná aftur í rapparann góðkunna, Vanilla Ice.

Síðast þegar liðið vann leik þá tróð Vanilla Ice upp í hálfleik. Þá var liðið undir en reif sig upp eftir sönginn hjá Ísmanninum í hálfleik og vann leik.

Nú er því komin pressa á að forráðamenn félagsins fái Vanilla Ice aftur á völlinn og spurning hvort farið verði í það.

Hér að neðan má sjá hluta af prógramminu hjá Iceman á Reliant-vellinum.