Munir frá Axl Rose á uppboði

Erin Everly fyrrverandi kona Axl Rose er að selja persónulega muni frá stuttu hjónabandi þeirra sem endaði í illu. Erin er dóttir Don Everly sem gerði garðinn frægan á sjötta áratugnum í The Everly Brothers. Axl og Erin voru gift á árunum 1990 til 1991 og samdi Axl lagið Estranged af Use Your Illusion II þegar hann var að jafna sig eftir skilnaðinn

Meðal þess sem er til sölu er skyrtan sem að Axl klæddist í Welcome To The Jungle myndbandinu og sömuleiðis leðurbuxur söngvarans. Innilegar myndir af Axl Rose í rúminu og í baði eru einnig falar. Aðdáendur geta sömuleiðis keypt afrit af hjónabandsvottorði þeirra og lögregluskýrslu vegna heimilisofbeldis frá lögreglunni í Los Angeles.

Axl Rose hefur ekki tjáð sig opinberlega um uppboðið.

Hér fyrir neðan má sjá myndbandið við Welcome To The Jungle með Guns & Roses. Þar sem að Axl skartar skyrtunni sem nú er til sölu.