Síðasta met Sigrúnar Huldar féll um helgina

Aníta Ósk Hrafnsdóttir sundkona bætti í dag 19 ára gamal met Sigrúnar Huldar Hrafnsdóttur í 200m bringusundi í 25m sundlaug. Aníta sem keppir í flokki S14, flokki þroskahamlaðra, bætti metið á bikarmóti SSÍ sem stendur yfir þessa helgina.

Fyrra met Sigrúnar Huldar var 3:07,40 mín. en hún setti metið á móti í Svíþjóð. Þar með eru öll met Sigrúnar Huldar í 25m sundlaug fallin en þessi magnaða sundkona var á sínum tíma einn allra fremsti íþróttamaður fatlaðra í heiminum.

Aníta lét ekki þar við sitja að bæta met Sigrúnar Huldar því hún bætti einnig met Kolbrúnar Öldu Stefánsdóttur í 800m skriðsundi er hún synti á tímanum 10:34,77mín.

Kolbrún Alda Stefánsdóttir lét einnig til sín taka á mótinu og setti tvö ný Íslandsmet í baksundi, í 100m baksundi er hún synti á 1:17,46mín og svo 200m baksundi þegar hún kom í bakkann á 2:43,15 mín.

Metin urðu alls fimm þennan laugardaginn á bikarmóti SSÍ því Jón Margeir Sverrisson setti nýtt Íslandsmet í flokki S14 er hann synti á 2:36,55mín í 200m bringusundi.