Gylfi Þór íþróttamaður ársins 2013 | Svona voru efstu tíu sætin

Knattspyrnumaðurinn Gylfi Þór Sigurðsson var í kvöld útnefndur íþróttamaður ársins á árlegu hófi Samtaka íþróttafréttamanna og Íþrótta- og Ólympíusambands Íslands í kvöld. Gylfi Þór fékk 446 stig í kjörinu.

Í öðru sæti með 288 stig var frjálsíþróttakonan Aníta Hinriksdóttir og handboltakappinn Guðjón Valur Sigurðsson kom þar á eftir með 236 stig.

Íslenska karlalandsliðið í knattspyrnu var valið lið ársins 2013 en sá árangur þess að komast í umspil um sæti á HM 2014 í Brasilíu er sá besti frá upphafi. Þá var Alfreð Gíslason kjörinn þjálfari ársins, annað árið í röð, en hann stýrir þýska handknattleiksliðinu Kiel.

Íþróttamaður ársins:

 

1. Gylfi Þór Sigurðsson, knattspyrna – 446 stig

2. Aníta Hinriksdóttir, frjálsar – 288 stig

3. Guðjón Valur Sigurðsson, handbolti – 236 stig

4. Jón Arnór Stefánsson, körfubolti – 206 stig

5. Kolbeinn Sigþórsson, knattspyrna – 189 stig

6. Sara Björk Gunnarsdóttir, knattspyrna – 134 stig

7. Alfreð Finnbogason, knattspyrna – 73 stig

8. Helgi Sveinsson, íþr. fatlaðra – 62 stig

9. Auðunn Jónsson, kraftlyftingar – 41 stig

10. Aron Pálmarsson, handbolti – 32 stig

 

11. Jóhann Rúnar Skúlason, hestaíþróttir – 23 stig

12. Hrafnhildur Lúthersdóttir, sund – 16 stig

13. Norma Dögg Róbertsdóttir, fimleikar – 15 stig

14. Birgir Leifur Hafþórsson, golf – 15 stig

15. Guðbjörg Gunnarsdóttir, knattspyrna – 14 stig

16. Guðmundur Sverrisson, frjálsar – 11 stig

17. Helena Sverrisdóttir, körfubolti – 7 stig

18. Dominiqua Alma Belanyi, fimleikar – 4 stig

19. Eygló Ósk Gústafsdóttir, sund – 4 stig

20. Aron Einar Gunnarsson, knattspyrna – 3 stig

21. Þóra Björg Helgadóttir, knattspyrna – 3 stig

22. Valdís Þóra Jónsdóttir, golf – 2 stig

23. Þórir Ólafsson, handbolti – 1 stig

 

Lið ársins:

 

1. A-landslið karla, knattspyrna – 125 stig

2. A-landslið kvenna, knattspyrna – 55 stig

3. Kvennalið Gerplu, hópfimleikar – 20 stig

 

Þjálfari ársins:

 

1. Alfreð Gíslason, handbolti – 54 stig

2. Sigurður Ragnar Eyjólfsson, knattspyrna – 34 stig

3. Gunnar Páll Jóakimsson, frjálsar – 33 stig

Gylfi Þór fór mikinn með íslenska karlalandsliðinu á árinu sem var einum leik frá því að tryggja sér þátttökurétt á heimsmeistaramótinu í Brasilíu næsta sumar. Liðið mætti Króatíu í tveimur umspilsleikjum en mátti játa sig sigrað.

Gylfi styrkti einnig stöðu sína hjá Tottenham í ensku úrvalsdeildinni á árinu. Hann spilaði mikið með liðinu síðari hluta tímabilsins 2012-2013 og hefur verið í aðalhlutverki með liðinu í undanförnum leikjum.

Gylfi gat ekki verið viðstaddur kjörið í kvöld þar sem Tottenham mætir Stoke á morgun á White Hart Lane. Gylfi er uppalinn FH-ingur líkt og handknattleikskappinn Aron Pálmarsson sem vann titilinn í fyrra.Kjörið fór fyrst fram árið 1956 og þetta er því í 58. sinn sem Samtök íþróttafréttamanna velja íþróttamann ársins. 25 af 26 félögum í SÍ nýttu atkvæðisrétt sinn að þessu sinni.