Þjóðin fær aukið vald í Söngvakeppninni í ár

„Auðvitað hafði gagnrýnin í fyrra með þessa ákvörðun að gera því við viljum alltaf gera betur. Þessi aðferð er notuð víða, í mismunandi útfærslum, svo það verður gaman að sjá hvernig þetta kemur út hér,“ segir Hera Ólafsdóttir hjá Rúv.

Tólf lög berjast um sigur í Söngvakeppni Sjónvarpsins í ár en hún er undankeppni Eurovision. Þau skiptast niður á tvær forkeppnir og komast sex lög áfram í úrslitin, mögulega sjö ef mjótt verður á munum. Í úrslitakeppninni gilda atkvæði þjóðarinnar til helmings við atkvæði sérstakar dómnefndar, sem endranær. Sú breyting verður þó á í ár að þau tvö efstu heyja einvígi sín á milli og verða flutt aftur þegar úrslitin liggja fyrir. Áhorfendur fá þá tækifæri til að kjósa á milli þeirra tveggja og það sem sigrar þá kosningu sigrar keppnina. Valið um sigurlagið liggur því að lokum hjá þjóðinni en á síðasta ári sköpuðust umræður um vægi dómnefndar.

Undankeppnirnar fara fram 25. og 26. janúar í Hörpu og úrslitin þann 2. febrúar. Það kemur í hlut Þórhalls Gunnarssonar og Guðrúnar Dísar Emilsdóttur að kynna keppnina í ár en bæði stíga þau sín fyrstu skref í Söngvakeppninni. Þeim til halds og trausts verða svo ýmsir gestir sem kemur í ljós á næstu dögum hverjir verða. „Það verður tuttugu mínútna upphitun fyrir allar keppnirnar þrjár og þar fara þessir gestir í forsvari,“ segir Hera. Frumflutningur á lögunum tólf hefst á Rás 2 á mánudaginn.- trs