Ég er ekki í sama klassa og Tiger

Fyrsta stórmót ársins, Masters-mótið, hefst á Augusta-vellinum á morgun. Mikil spenna er líkt og venjulega fyrir mótinu. Flestra augu beinast að Nike-félögunum Tiger Woods og Rory McIlroy. Fjölmiðlar hafa reynt að stilla þeim upp sem helstu keppinautum fyrir mótið en Norður-Írinn McIlroy hefur reynt að draga úr öllu slíku tali.

„Ég lít ekki á mig sem einhvern aðalkeppinaut Tiger Woods eða nokkurs annars kylfings. Ég held að Tiger sé búinn vera atvinnumaður tólf árum lengur en ég," sagði McIlroy.

„Þegar talað er um einhverja keppinauta er rétt að bera saman árangur manna. Tiger hefur unnið 77 PGA-mót en ég sex. Hann hefur unnið fjórtán risamót en ég tvö. Ef ég væri að bera mig saman við hann væri ég að tala hann niður."

Rory hefur átt erfiða síðustu mánuði en lék vel á móti í síðustu viku þar sem hann varð í öðru sæti. Hann virðist því vera að detta í gírinn á réttum tíma.

„Mér líður vel og finnst ég vera tilbúinn. Ég er búinn að venjast nýju kylfunum og hef ekki yfir neinu að kvarta."