Stoltur faðir framúrskarandi listamanna

„Það eru þrjú ár á milli þeirra bræðra en þeir hafa alltaf verið rosalega nánir. Þeir hafa alltaf verið ótrúlega hugmyndaríkir og leikirnir þeirra í æsku voru hin mestu ævintýri. Ætli það hafi ekki verið þar sem sköpunargáfan kom fyrst fram,“ segir Jörundur Guðmundsson, forstöðumaður Háskólaútgáfunnar og faðir fatahönnuðarins Guðmundar Jörundssonar og tónlistarmannsins Þórðar Jörundssonar.

Þeir bræður Guðmundur og Þórður eru báðir meðal vinsælustu listamanna landsins um þessar mundir, hvor í sinni greininni.

Fatahönnuðurinn Guðmundur opnaði um helgina fataverslun á Laugaveginum þar sem hann selur hönnun sína undir merkinu Jör og Þórður er gítarleikari í einni vinsælustu hljómsveit landsins um þessar mundir, Retro Stefson. Þeir bræður eiga svo eldri systur Auði, sem er framkvæmdastjóri i8 listagallerísins. „Auður er sjö árum eldri en Gummi og hefur haft mikil áhrif á bræður sína,“ segir Jörundur.

Spurður segir Jörundur því ekki auðsvarað hvernig ala eigi upp slíkt hæfileikafólk eins og þau systkin. „Við móðir þeirra [Jakobína Þórðardóttir] höfum bæði mikinn áhuga á listum og hönnun og vorum hæfilega dugleg að halda því að þeim í æsku og styðja þau í því sem þau höfðu áhuga á. Það hefur örugglega haft sitt að segja en svo er þetta líka bara meðfætt held ég,“ segir hann. „Það er bara frábært að sjá þau öll skara fram úr á sínu sviði. Ég er fullur af auðmýkt og stolti í þeirra garð.“