Ætla mér á Evrópumótaröðina á ný

Birgir Leifur Hafþórsson, kylfingur úr GKG, lék í gær annan hringinn á mótinu Czech Challenge Open á 65 höggum, eða sjö höggum undir pari. Mótið er hluti af Áskorendamótaröðinni í Evrópu. Birgir Leifur fór á kostum í Drítec í Tékklandi í gær, en hann náði í sjö fugla og tapaði engri holu á hringnum. Kylfingurinn er samtals á tíu höggum undir pari og ætlar sér stóra hluti á mótinu.

„Ég er eins og staðan er núna í fjórða sæti mótsins,“ sagði Birgir Leifur Hafþórsson í samtali við Fréttablaðið í gær.

„Það má eiginlega segja að ég hef gert allt vel á mótinu. Það er allt að ganga upp og ég er að setja niður þau færi sem mér gefast. Ég ákvað fyrir mótið að vera bara grimmur og taka töluverða áhættu í mínum leik.“

Slæ án þess að hika

„Þessa fyrstu tvo daga hef ég bara slegið beint á stöngina án þess að hika, maður verður stundum að spila ákveðið til að ná góðum árangri.“

Birgir Leifur leikur eins og áður kom fram á Áskorendamótaröðinni í Evrópu, en þar þurfa menn að hafa sig alla við til að komast inn á Evrópumótaröðina.

„Þetta er einfaldlega þannig mótaröð að kylfingarnir verða að spila grimmt til að ná góðum úrslitum og rífa sig upp úr þessari deild. Þetta er í raun 2. deildin í Evrópu og ég ætla mér ekki að staldra lengi við þar. Þeir kylfingar sem taka þátt á þessari mótaröð eru margir hverjir virkilega góðir og maður þarf bara að láta vaða. Það er samt stutt á milli hláturs og gráts í þessu, stundum fer allt á annan endann hjá manni ef maður spilar á þennan hátt.“

Birgir Leifur er stórhuga á þessu tímabili.

„Ég ætla mér að vinna þetta mót og ætla bara að halda áfram að spila eins og ég gerði á fyrstu tveimur hringjunum. Ég þarf að vera inni á topp tuttugu á þessu tímabili til að komast á Evrópumótaröðina og það er klárlega markmiðið.“