Gaman að sjá Gísla Martein fá drullu yfir sig

„Fólk hefur gaman að því að sjá einhvern eins og Gísla Martein fá drullu í andlitið,“ segir Jón Páll Hreinsson, einn af skipuleggjendum Mýrarboltans sem fram fer á Ísafirði um verslunarmannahelgina.

Það hefur varla farið framhjá lesendum Vísis að aðstandendur Mýrarboltans hafa sett af stað góðgerðarátak í samstarfi við Vísi, Landsbankann, Avis og Carlsberg þar sem athygli er vakin á fjórum góðgerðarsamtökum með afar skemmtilegum hætti.

„Við byrjuðum á því að setja eina milljón í gjafafé í verkefnið og höfðum svo samband við Barnaheill, Þroskahjálp, MND-félagið og ADHD-samtökin. Um leið fengum við svo marga þekkta einstaklinga með í verkefnið og þeir samþykktu að láta kasta drullu framan í sig og um leið vekja athygli á góðgerðarsamtökunum. Svo getur fólk farið inn á slóðina visir.is/drullastu og valið á milli samtakanna og ákveðið hvert milljónin fer,“ segir Jón Páll. 

Hann segir góðgerðarátakið vera eins konar „crowdfunding“, en það er þegar hver og einn einstaklingur getur haft áhrif á það hvernig góðgerðarsjóður skiptist á milli góðgerðarsamtaka. 

Fjölmargir Íslendingar tóku þátt í verkefninu en þar má meðal annars nefna þau Friðrik Dór, Gísla Martein og Hildi Lilliendahl. 

„Við reyndum að fá svona þverskurð af áhrifamiklu fólki í samfélaginu til að vekja athygli á góðgerðarmálum á nýstárlegan hátt,“ segir Jón Páll. Það mun svo skýrast á sjálfum Mýrarboltanum hvernig milljóninni verður ráðstafað. 

Hér fyrir neðan má sjá myndbandið þar sem Gísli Marteinn fær drulluna yfir sig. Fleiri myndbönd má sjá á Vísir Sjónvarp.

Taktu þátt hér!