Wikileaks brotlendir

Kvikmyndin Fifth Estate, eða Fimmta valdið, sem fjallar um Wikileaks er að mati viðskiptatímaritsins Forbes stærsti skellur ársins. Þrátt fyrir ágætis leik Benedicts Cumberbatch sem Julian Assange, hápólitískt viðfangsefni og hinn verðlaunaða leikstjóra Bill Condon við stjórnvölinn gekk myndin ekki upp.

Kvikmyndin, þar sem reynt er að segja sögu Wikileaks frá stofnun samtakanna til dagsins í dag, hefur hlotið skelfilega gagnrýni og dræmar viðtökur áhorfenda auk þess sem Julian Assange hefur fordæmt myndina og sagt hana áróður. Hún hefur aðeins skilað 6 milljónum Bandaríkjadala í tekjur en kostaði 28 milljónir í framleiðslu.



Forbes útnefnir tíu stærstu skelli ársins og í öðru sæti er kvikmyndin Bullet to the Head með Sylvester Stallone sem skilaði aðeins 9 milljónum Bandaríkjadala í tekjur og í því þriðja Paranoia með Harrison Ford og Gary Oldman.