Syngja uppáhalds- barokkaríurnar sínar

„Sem betur fer eigum við ekki sömu uppáhaldsbarokkaríurnar og svo erum við með talsvert ólíkar raddir þó við séum báðar mezzosópran,“ segir Jóhanna Héðinsdóttir sem ásamt Nathalíu Drusin Halldórsdóttur syngur í Háteigskirkju í hádeginu í dag. Yfirskrift tónleikanna er Himneskt hádegisbarokk. Sem dæmi um aríu sem hún ætlar að syngja nefnir Jóhanna Ombra Mai Fu úr óperunni Serse eftir Händel. „Meðal þess sem Nathalía syngur er Lachia Ch‘io Pianga sem er mjög þekkt aría og er reyndar líka eftir Händel en það er alls ekki öll efnisskráin eftir hann,“ bætir hún við og tekur fram að þær njóti píanóundirleiks Renötu Ivan.



Nathalía starfar í ráðningarfyrirtæki og var að syngja í Requiem eftir Mozart með Háskólakórnum og Jóhanna er grunnskólakennari auk þess að vera í félagsskap annarra óperusöngvara í Óp hópnum. „Við erum báðar að reyna að vera söngkonur, auk þess að vera í fullu starfi og með börn. Svona er þetta hér á Íslandi.“