Nóg að gera hjá nýkrýndum Íslandsmeisturum

Um helgina fór fram Íslandsmótið í listhlaupi á skautum í Egilshöll en alls tók 61 keppandi þátt. Vala Rún B. Magnúsdóttir, sautján ára, varð Íslandsmeistari í unglingaflokki en það er elsti flokkurinn sem keppt var í. Hin fimmtán ára Kristín Valdís Örnólfsdóttir vann í stúlknaflokki en báðar keppa þær fyrir SR.

„Þrátt fyrir ungan aldur eru þær báðar reynsluboltar sem hafa æft mikið og lengi,“ sagði Bjarnveig Guðjónsdóttir hjá Skautasambandi Íslands.

Keppnistímabilið er í fullum gangi og nær hápunkti í febrúar þegar Norðurlandamótið fer fram í Svíþjóð. Fyrir það keppir landsliðið einnig á sterku móti í Slóvakíu auk þess sem okkar besta fólk keppir á Reykjavíkurleikunum í janúar.

„Það eru því strangar æfingar fram undan og okkar besta fólk er til að mynda að fara í æfingabúðir um jólin,“ segir Bjarnveig. Sem stendur hafa sex náð lágmarksviðmiði fyrir landsliðshópinn – tvær í unglingaflokki og fjórar í stúlknaflokki.