Litlar líkur á vatnsleysi á komandi sumri?

Flestir landsmenn hugsa vetrinum líklega þegjandi þörfina þessa síðustu daga þá kannski sérstaklega þeir sem búa á norður og vesturlandi.

Það var þó stutt í gleðiglottið hjá vini mínum á norðurlandi þegar ég heyrði í honum í dag og eins og landans venjur eru spurði ég um stöðu veðurs hjá honum.  Hann er ekki skíðamaður eða í nokkurri vetrarútivist en veiðimaður er hann af lífi og sál.  Hann sá bara litlar líkur á vatnsleysi í ánum sem hann ætlar að veiða á komandi sumri og sagði að miðað við snjóalög í kringum hans heimabyggð verður gott vatn í ánum alltu sumarið.  "Hvað ef næsta sumar verður jafn kalt og blautt eins og sumarið sem leið" spyr ég rétt til að reyna að slökkva aðeins í háum væntingum sem ég held að hafi búið um sig í honum.  Tvö sumur í röð þykir honum heldur ólíklegt með refsingar veðurfars til handa þjóðinni svo vonin er ennþá björt eins og væntanlegir sumardagarnir sem hann er farinn að sjá í fjarska.

En það er bara nokkuð til í þessu.  Það hefur snjóað mikið og ennþá er hávetur svo það má alveg reikna með að það safnist aðeins meira í fjöll og það veit á gott fyrir vatnsbúskap ána.  Veiðimenn á Suðvesturlandi sem hafa fengið nokkur vatnslaus ár á undanförnum áratug eru sérstaklega bjartsýnir um gott vatn og það þýðir að árnar sem ég hef haldið mikið uppá, Langá, Laxá í Kjós, Grímsá, Hítará, Norðurá og Laxá í Kjós ættu allar að geta séð veiðimönnum og löxum fyrir góðu vatni í sumar.  Ég í það minnsta var kominn með nóg af því að veiða í rigningu og vatnmiklum ám síðasta sumar og varla nenni annari svoleiðis vosbúð.