Tveir frábærir hringir dugðu ekki til

Ólafur Björn Loftsson, kylfingur úr Nesklúbbnum, var einu höggi frá því að öðlast takmarkaðan þátttökurétt á PGA-mótaröðinni í Suður-Ameríku. Keppni á úrtökumótinu í Orlando lauk í dag.

Ólafur Björn spilaði lokahringinn í gær á 70 höggum líkt og hann gerði í gær. Aðeins fjórir kylfingar voru með betra skor á seinni tveimur hringjunum en síðustu kylfingarnir luku leik í dag. Skelfilegur annar hringur varð Ólafi Birni að falli en þá spilaði Ólafur Björn á 80 höggum.

„Niðurstaðan vissulega vonbrigði en miðað við spilamennskuna seinni part mótsins hef ég fulla ástæðu til að vera bjartsýnn,“ skrifar Ólafur Björn á Fésbókarsíðu sína. Ólafur hafnaði í 52. sæti á úrtökumótinu ásamt fleiri kylfingum. Lokastöðuna má sjá hér.

„Þegar á heildina er litið vantar mig einfaldlega aðeins meiri tíma til að aðlagast nýjum háttum og munu næstu vikur fara í að festa allt saman betur inn. Ég er á flottri leið og nú er bara að halda áfram að vinna markvisst að mínum markmiðum.“