Vodafone veitti upplýsingar um fimm ára gömul símtöl

Lögreglan á höfuðborgarsvæðinu fékk fimm ára gamlar upplýsingar frá Vodafone um símtöl vegna rannsóknar á kynferðisbrotamáli gegn lögreglumanni á höfuðborgarsvæðinu. Vodafone er aðeins heimilt að geyma upplýsingarnar í sex mánuði.

Í febrúar 2012 óskaði lögregla eftir því í tölvupósti við Vodafone að fá aðgang að upplýsingum um símtöl milli tveggja númera hjá símafyrirtækinu. 45 mínútum síðar barst lögreglu svar frá Vodafone með upplýsingum um þrjú símtöl frá árinu 2007. Þá voru fjögur og hálft ár liðin frá því að gögnunum hefði átt að vera eytt samkvæmt 42. grein fjarskiptalaga.

Afrit af tölvupóstsamskiptunum má finna í málsgögnum sem birt voru á vefnum með leyfi aðstandenda þolanda í málinu. Blaðamaðurinn Páll Hilmarsson vakti athygli á málinu á Facebook-síðu sinni, en málsgögnin sem birt voru eru 146 blaðsíður.

Lögreglan á höfuðborgarsvæðinu áframsendi gögnin frá Vodafone til lögreglunnar á Akranesi, sem fór með rannsókn málsins, og lét eftirfarandi skilaboð fylgja: „Sælir. Svo ótrúlegt sem það er þá fengum við þessi svör frá Vodafone“.

Fjarskiptalög kveða skýrt á um að varðveisla gagna lengur en í sex mánuði sé óheimil. Í kjölfar Vodafone-lekans svokallaða í fyrra skýrðu forsvarsmenn Vodafone geymslu gagna umfram mánuðina sex með því að viðskiptavinum á vefsíðu fyrirtækisins stæði til boða að geyma send smáskilaboð. Til að gera það ekki þyrftu þeir að taka tiltekið hak af á vefsíðunni. Þá greindi Vodafone frá því að við ítarlega skoðun hafi einnig fundist eldri gögn í bakendakerfum, en þeim hafi verið eytt í kjölfar lekans.

Hrafnkell V. Gíslason, forstjóri Póst- og fjarskiptastofnunar, hafði ekki heyrt af málinu þegar fréttastofa hafði samband við hann en hann sagði að almenna reglan væri sú að upplýsingar um símtöl, svokallaðar fjarskiptaumferðarupplýsingar, mætti ekki geyma lengur en í sex mánuði.

„Í þessu máli er verið að afhenda lögreglu gögn samkvæmt dómsúrskurði,“ segir Hrannar Pétursson, upplýsingafulltrúi Vodafone, í skriflegu svari við fyrirspurn Vísis. „Vorið 2012 var verklagi við geymslu og eyðingu gagna breytt að höfðu samráði við Póst- og fjarskiptastofnun, en fyrir þann tíma voru til gögn sem voru eldri en 6 mánaða. Engin slík gögn eru til í dag.“

Fram kemur í ákvörðun Póst- og fjarskiptastofnunar um varðveislu upplýsinga um fjarskiptaumferð hjá Símanum frá október 2011 að skýrt sé að gögn af þessu tagi eigi ekki að geyma lengur en í sex mánuði.