Jimmy Walker í góðri stöðu á Pebble Beach

Jimmy Walker stóð sig best í rokinu á þriðja hring á AT&T Pebble Beach National Pro-Am golfmótinu í Kaliforníu í gær. Walker er með sex högga forystu þegar leik var frestað seint í gær.

Þrátt fyrir mikinn vind lék Walker á fjórum höggum undir pari eða á 67 höggum. Hann er alls á 13 höggum undir pari þegar hann á einn hring eftir en margir kylfingar lentu í vandræðum í rokinu áður en leik var frestað.

Hunter Mahan og Nýsjálendingurinn Tim Wilkinson eru á sjö höggum undir pari. Phil Mickelson sem fjórum sinnum hefur unnið mótið er á 5 undir ásamt sex öðrum kylfingum þar á meðal Jordan Spieth sem á enn eftir að leika þrjár holur á þriðja degi.

Bein útsending frá fjórða keppnisdeginum hefst klukkan 20.00 á Golfstöðinni í kvöld.