Styrmir Dan stökk enn hærra | Myndband

Hástökkvarinn stórefnilegi Styrmir Dan Steinunnarson, HSK, bætti Íslandsmet pilta fimmtán ára og yngri á Meistaramóti Íslands í frjálsíþróttum innanhúss um helgina.

Styrmir Dan bætti eigið Íslandsmet í greininni um einn sentímetra er hann stökk yfir 1,91 m í þriðju tilraun. Hann reyndi svo þrívegis við 1,94 m.

Gamla metið setti hann í byrjun desember þegar hann keppti enn í flokki fjórtán ára og yngri. Þá bætti hann 35 ára gamalt met Stefáns Þórs Stefánssonar í flokki fimmtán ára og yngri.

Með því stökki náði hann að bæta sig um tíu sentímetra og sýndi hann um  helgina að það var engin tilviljun. Besti árangur hans utanhúss er 1,78 m en afar líklegt er að hann bæti það í sumar.