Dustin Johnson efstur eftir fyrsta keppnisdag

Bandaríkjamaðurinn Dustin Johnson er í forystu á Northern Trust-mótinu í golfi eftir fyrsta keppnisdag.

Mótið er hluti af PGA-mótaröðinni og fer fram í Kaliforníu en Johnson fór fyrsta hringinn á 66 höggum eða fimm höggum undir pari.

Heill her manna fylgir fast á hæla hans en ellefu menn fóru hringinn í gær á 67 höggum og deila öðru sætinu.

Þar á meðal eru Ítalinn Francesco Molinar, Suður-Kóreumaðurinn Sang-Moon Bae og Jimmy Walker frá Bandaríkjunum.

Ian Poulter frá Englandi og Belginn Nicolas Colsaerts áttu ekki góðan dag en þeir eru á einu höggi yfir pari.

Hér má sjá heildarstöðuna á mótinu eftir fyrsta hring en allir keppnisdagarnir eru í beinni útsendingu á Golfstöðinni.