Ég er vanur höfnun

„Ég er mikill keppnismaður en ég er vanur höfnun," segir FLosi Jón Ófeigsson 29 ára sem var dæmdur úr keppninni Ísland Got Talent á Stöð 2 í gærkvöldi eftir flutning sinn á Eurovisionslagaranum „Ég á líf“ sem sjá má í myndskeiðinu hér fyrir ofan.  Við heyrðum í Flosa sem er Eurovision aðdáandi númer eitt og spurðum hann meðal annars hvernig söngkonan Bonnie Tyler virkaði á hann en þau kynntust á Eurovisionkeppninni í Malmö í Svíþjóð í fyrra.

Hvernig var að hitta sjálfa Bonnie Tyler? „Hún var eins og barbiedúkka. Það er örugglega ekki til partur af líkamanum á henni sem er ekki búinn að fara í aðgerð – hún var eins og gína. Annars var hún rosalega vingjarnleg. Ein stelpa í hópnum okkar var ólétt á þessum tíma og Bonnie breyttist í lítla móður þegar hún sá hana og fór að tala um börn. Annars fengum við rosa stuttan tíma til að tala við hana. Við fengum allavegana myndir með henni,“ segir hann.

„Bobbysocks – þær voru svaka orkuboltar. Það var eins og þær hefðu ekki gert neitt annað en að koma fram síðan þær unnu Eurovision en það má deila um sönggæðin. Þá meina ég hvernig þær eru orðnar núna. Þær eru fullorðnar konur og það var kannski ekki allt í réttum tónum þegar þær sungu,“ segir Flosi og vonbrigðin leyna sér ekki.

Hótelstjóri á sumrin

Hvað starfar þú? „Ég er hótelstjóri á fjölskylduhóteli á Egilsstöðum á Hótel Eyvindará. Ég er núna að fylla hótelið með því að svara bókunum. Það er alveg brjálað að gera og voða gaman. Svo er ég þar á sumrin frá miðjum maí til lok september. Þá syng ég fyrir gestina í kvöldmatnum.“ 

Tekur þú Eurovisionlög fyrir hótelgestina? „Já stundum tek ég lagið „Ég á líf“ og gamla íslenska slagara. Ég syng alltaf eitthvað íslenskt. Það er rosa gaman. Það tengir mig við gestina, þá næ ég persónulegum tengslum án þess að missa orkuna,“ segir Flosi.

„Ég fór fyrst á Eurovision þegar keppnin var í Osló árið 2010 og hef farið á allar keppnirnar síðan. Þá var enginn aðdáaendaklúbbur í Íslandi. Þegar ég fór til Noregs sat ég með sárt ennið því ég komst ekki nema einu sinni eða tvisvar á Euroklúbbana á meðan á keppninni stóð. En ég lærði þetta smátt og smátt. Svo stofnuðum við okkar eigin aðdáendaklúbb hér á landi sem kallast FÁSES.“ 

Er stefnan sett á keppnina Kaupmannahöfn í sumar? „Já, ég er búinn að kaupa miða og flug. Það er allt klárt. Við verðum úti í tíu daga en við vorum svo heppnir að fá heimagistingu.“

En að unnusta þínum Tusan Cuhadar - hann hefur stutt þig þegar þú kepptir í Ísland Got Talent? „Já, hann róaði mig niður með prjóni í keppninni.“

Giftist ástinni í sumar

„Við þurftum að taka stóra ákvörðun og giftum okkur í júlí á Egilsstöðum og þá opnaðist dyr fyrir okkur að stofna heimili og nú get ég lifað eðlilegu lífi með honum en ég var orðinn þreyttur á að vera í sambandi milli landa. Hann varð að kveðja fjölskyldu sína í bili og flytja hingað, alla leið frá Tyrklandi en hann er að fíla þetta og elskar Ísland og finnst það rosa gaman,“ segir Flosi ánægður með lífið og tilveruna.